සිංහල බෞද්ධ තේමාව යටතේ “සිහළ උරුමය” නමින් සිංහල දේශපාලන පක්ෂයක් ආරම්භ කළ අවස්ථාවේ උදය ගම්මන්පිල එහි සමාරම්භක සමාජිකයෙක් ලෙසත් 2001 වසරේදී එම පක්ෂයේ ප්‍රචාරක ලේකම් ධූරයටත් පත්වන උදය ගම්මන්පිල පසුව එහි නියෝජ්‍ය ප්‍රධාන ලේකම් ධූරයට පත් වී 2004 දී භික්ෂුන් වහන්සේලාගේ ආගමනයත් සමඟ පක්ෂයේ නම ජාතික හෙළ උරුමය ලෙස වෙනස් වීමෙන් පසුවද එහි ආරම්භක පරිපාලන ලේකම්වරයා හා නීති උපදේශකවරයා වශයෙන් කටයුතු කරමින් තම දේශපාලන ගමන ආරම්භ කර 2009 පළාත් සභා මන්ත්‍රී ධූරයේ සිට රටේ වගකිවයුතු ඇමතිධූර සහ කැබිනට් ඇමති තනතුරු දක්වාම දේශපාලන ගමනක් ගිය පුද්ගලයෙකි.
රුපියල් සීය බැගින් එකතුකර තම දේශපාලන ගමන ගොඩනඟා ගත් ගම්මන්පිල මහින්ද සුළඟ වැනි දේශපාලන කැම්පේන්වලිනුත් 2019 ජනාධිපතිවරණ සටනේ ඉදිරිපෙල නායකයෙකු ලෙස ගෝඨාභය රාජපක්ෂගේ ජයග්‍රහණය වෙනුවෙන් සිය දායකත්වය මුල සිටම ලබා දෙමින් ගෝඨාභය රාජපක්ෂ ව ක්‍රියාකාරි දේශපාලනයට රැගෙන ඒමටද මුල්වු අයෙක් ලෙස සැලකෙයි. මේ කුමන ආකාරයෙන් වුවත් ප්‍රභල ඡන්ද පදනමක් නොමැති ඔහුගේ පක්ෂය බලය ලබා ගැනීම පිළිබඳව පැහැදිලි ජයග්‍රහණයක් පෙනෙන නායකත්වයකට හේත්තු වී තම දේශපාලන ගමන ස්ථාවර කරගැනීමට උපන් හපෙනෙකි. ඒ සඳහා ඔහු අපූරුවට කාලීන සමාජ කතිකාවන්ද තම භූමිකාව මෙහෙයවීම සඳහා යොදා ගනී. මෙවර ඔහු යොදා ගෙන ඇති කතාබහට ලක්වන තේමාව වන්නේ පාස්කු ඉරිදා ත්‍රස්ත ප්‍රහාරය සම්බන්ධයෙන් තමා සතු වාර්තා ආණ්ඩුවට ලබා දීමට නම් ඒවා ප්‍රසිද්ධ කරන බවට ප්‍රතිඥාවක් ලබා දිය යුතුව ඇතැයි යන ආන්දෝලනාත්මක කතිකාවතයි. එතෙක් තමන් සතුව ඇති වාර්තා ආණ්ඩුවට භාර දීමට සූදානම් නැති බව ද ඔහු සඳහන් කර සිටී.
උදය ගම්මන්පිල මාධ්‍ය ඉදිරියේ පවසා සිටින්නේ මෙසේයි, “පාස්කු ඉරිදා ත්‍රස්ත ප්‍රහාරයේ වාර්තාව ආණ්ඩුවට භාර දෙන්න නම් ඒක ප්‍රසිද්ධ කරන බවට ප්‍රතිඥාවක් ඕනෑ. ඉදිරි දින හත තුළ ජනාධිපතිතුමා විසින් දැනට ප්‍රසිද්ධ කර නැති පාස්කු ඉරිදා ප්‍රහාරය පිළිබඳ කමිටු වාර්තා ප්‍රසිද්ධ නොකළොත් මම ඒවා ප්‍රසිද්ධ කරන බවට පසුගිය සඳුදා මාධ්‍ය හමුවේ දී ජනාධිපතිතුමාට මම අනතුරු ඇඟෙව්වා.
මේ පිළිබඳ ප්‍රතිචාර දක්වමින් ආණ්ඩුවේ මාධ්‍ය ප්‍රකාශක විජිත හේරත් ඇමැතිතුමා කිව්වේ මා සතු වාර්තාව ආණ්ඩුවට භාර දෙන්න දවස් තුනක් කල් දෙන බවයි. ඒ වගේම මට වාර්තා ලැබුණු විදිය සොයා ගන්නත් ඕනෙලු. මට වාර්තා ලැබුණු විදිහ නොවේ සොයන්න ඕනේ. මාලිමාවේ නායකයන් විපක්ෂයේ සිටින කාලයේ ප්‍රසිද්ධ කළ යුතුයි කියලා ආණ්ඩුවට බල කළ මේ වාර්තා දෙක බලය ලැබුණු පසු ප්‍රසිද්ධ කිරීමට පැකිළෙන්නේ ඇයි කියන හේතුවයි විජිත හේරත් මහතා රටට හෙළි කළ යුත්තේ.
මේ වාර්තා යට ගහන්න ආණ්ඩුව දක්වන උනන්දුවට හේතුවයි සොයන්න ඕනි. මහජනතාවට ඇත්ත දැනගන්න මේ වාර්තා ප්‍රසිද්ධ කරන්න කියලා ඔබතුමාගෙන් ඉල්ලුවාම ඔබතුමා මට කියන්නේ වහාම මගේ ළඟ තිබෙන වාර්තාවත් ආණ්ඩුවට භාර දෙන්න කියලා. නමුත් මම වාර්තාව ආණ්ඩුවට භාර දුන්නාම ඒක ප්‍රසිද්ධ කරන බවට කිසිම පොරොන්දුවක් නෑ. මගේ වාර්තාවත් ආණ්ඩුවට භාර දුන්නාට පස්සේ ආණ්ඩුව ඒක ප්‍රසිද්ධ නොකර සිටියොත් අපි මොකද කරන්නේ? ආණ්ඩුව කියන්නේ මේ තොරතුරු සදහටම අබිරහසක් කරන්න ආණ්ඩුවට උදවු කරන්න කියලා. ඒ නිසා ආණ්ඩුව මේ වාර්තා ප්‍රසිද්ධ කරන බවට ප්‍රතිඥාවක් ලබා දෙනතුරු මගේ ළඟ තිබෙන වාර්තා ආණ්ඩුවට භාර දෙන්න මම සූදානම් නෑ.
මෙම වාර්තා දෙක සඟවා තබන්න ආණ්ඩුව උත්සාහ කිරීම මහජන මුදලින් සකස් කළ වාර්තාවල තිබෙන ඇත්ත දැන ගැනීමේ අයිතිය ජනතාවගෙන් උදුරා ගැනීමක්. මහජන මුදලින් සැකසූ වාර්තාවක අන්තර්ගතය දැන ගැනීමට මහජනතාවට අයිතියක් තියෙනවා. ඒ වගේම මේවා සැඟවීම ආණ්ඩුක්‍රම ව්‍යවස්ථාවෙන්ම සහතික කර ඇති ජනතාවගේ සිතීමේ නිදහසට වැටකඩුලු බැඳීමක්. ඒ නිසා මේ වාර්තාව මා ළඟ තබා ගැනීම බරපතළ අපරාධයක් කියලා මාව බය කරන්න විජිත හේරත් ඇමැතිතුමාට බෑ. ප්‍රසිද්ධ කිරීමට පොරොන්දු නොවෙනවා නම් මම මේවා භාර දෙන්නෙත් නෑ. ආණ්ඩුව මේක ප්‍රසිද්ධ නොකළොත් දින 7කින් පසු මම මේක අනිවාර්යයෙන්ම ප්‍රසිද්ධ කරනවා.
ජනතාවගේ තොරතුරු දැන ගැනීමේ අයිතිය වෙනුවෙන් අප අද වගේම හෙටත් පෙනී ඉන්නවා. පසුගිය ජනාධිපතිවරු දෙන්නෙක්ම බලයට ආවේ පාස්කු වින්දිතයන්ට යුක්තිය ඉටු කරනවා කියලා. විශේෂයෙන්ම වත්මන් ජනාධිපතිතුමාට විශාල ඡන්ද ගණනක් ලැබුණා මේ කාරණය සම්බන්ධයෙන් පෙනී සිටිය නිසා. ජනාධිපති කාර්යාලයෙන් මේ වාර්තා පිටවුණු ආකාරයයි සොයා බැලිය යුත්තේ. ජාතික ආරක්ෂාව අනතුරට වැටෙන සංවේදී තොරතුරු වාර්තා දෙකේ ඇමුණුම්වල තිබෙන නිසා ඇමුණුම් ප්‍රසිද්ධ කරන්න එපා කියලා වාර්තාවල සඳහන් වෙනවා.
ජාතික ආරක්ෂාව වෙනුවෙන් හැමදාමත් පෙනී සිටිය විපක්ෂයේ මන්ත්‍රීවරයෙක් විදිහට මම මේ ඇමුණුම් කිසිසේත් ප්‍රසිද්ධ කරන් නෑ. මම ප්‍රසිද්ධ කරන්නේ වාර්තා පමණයි. ඉමාම් වාර්තාව රනිල් වික්‍රමසිංහ ජනාධිපතිතුමා ගාව මාස තුනක් තිබුණා. කාටවත්ම පිට වුණේ නෑ. නමුත් අනුර දිසානායක ජනාධිපතිතුමා බලයට ඇවිත් සති තුනක් ගතවෙන්න කලින් මේ වාර්තා දෙකම පිටවුණා. ඒ කියන්නේ රනිල් වික්‍රමසිංහ ජනාධිපතිතුමාගේ කාර්ය මණ්ඩලය එතුමාට පක්ෂපාතීව කටයුතු කළත් අනුර දිසානායක මහතාගේ කාර්ය මණ්ඩලය එතුමාට පක්ෂපාතී නෑ කියන එක නේද? ඒ නිසා මට ලැබුණු විදිය හොයන එක පැත්තකින් තියලා ජනාධිපති ලේකම් කාර්යාලයෙන් මේ වාර්තා පිටවුණේ කොහොමද කියන එක ගැන අපේ හේරත් ඇමැතිතුමා දැන්ම පරීක්ෂණයක් ආරම්භ කළ යුතුයි.
මේ වාර්තා මම ප්‍රසිද්ධ කරන බව කියලා තිබෙන නිසාත් මේ වාර්තාවල ඇමුණුම් විධියට ජාතික ආරක්ෂාවට අතිශයින්ම සංවේදී බුද්ධි තොරතුරු විශාල ගණනක් ඇතුළත් වෙලා තිබෙන නිසාත් ඒවා ප්‍රසිද්ධ නොකළ යුතු බවට කමිටු විසින් නිර්දේශ කර තිබෙන නිසාත් මේ වාර්තා ප්‍රසිද්ධ කිරීමට පෙර රාජ්‍ය රහස් පනත සහ ත්‍රස්තවාදය වැළැක්වීමේ පනත යටතේ මාව අත්අඩංගුවට ගැනීමට ඇති හැකියාව පිළිබඳ ඊයේ රාත්‍රියේ ආණ්ඩුවේ ඉහළ පෙළේ සාකච්ඡාවක් පැවැති බව අපට ආරංචි වුණා. 2015 සිට 2018 දක්වා දූෂණ විරෝධී කමිටුවට ලැබුණු දූෂණ පිළිබඳ තොරතුරු අඩංගු ලිපිගොනු මාලිමාවේ නායකයන් ප්‍රදර්ශනය කරමින් ළඟ තබා ගත්තා. මම දවස් හතරක් ලිපිගොනුවක් ළඟ තබා ගැනීම බරපතළ අපරාධයක් නම් වසර නවයක් පුරාවට මේ ලිපිගොනු ළඟ තබා ගත් මාලිමා නායකයන් කෙතරම් බරපතළ අපරාධකාරයෝ ද? මට දඬුවම් කරන්න කලින් ඒ අයට දඬුවම් කරලා හිටියොත් හොඳ ආදර්ශයක් නේද ඇමැතිතුමනි.
වංචා දූෂණ පිළිබඳ තමන් සතු තොරතුරු ආණ්ඩුවට ලබා දෙන්න කියා මාලිමාවේ වසන්ත සමරසිංහ මහතා ජනතාවගෙන් ඉල්ලීමක් කළා. බයක් හැකක් නැතිව දැන් ජනතාව මේ තොරතුරු දෙන්නේ කොහොමද? මේ තොරතුරු දෙන්න ගිහින් ඒ ජනතාවටත් තොරතුරු තමන් ළඟ මෙතෙක් දවසක් තබා ගත්තා කියලා මට වගේ දඬුවමට ලක්වීමේ අවදානමක් ඇති වේද කියන සාධාරණ බය ඇති වෙනවා නේද? ඒ නිසා දින හතරක් වාර්තාව ළඟ තබා ගැනීම බරපතළ අපරාධයක් කියලා විජිත හේරත් ඇමතිතුමා කළ ප්‍රකාශය වහාම ඉල්ලා අස් කර ගන්න කියලා මම ඇමැතිතුමාගෙන් ඉල්ලා සිටිනවා.”
මෙතෙක් පැවති රජයන් වලින් කාපට් එකට යට වූ පාස්කු වින්දිතයන් අපේක්ෂා කරන සාධාරණය අලුත් ආණ්ඩුවක් යටතේ මෙවර හෝ උදාවේවි ද තැතිනම් විවිධ දේශපාලනඥයන්ට තම ඡන්ද අපේක්ෂාවන් වෙනුවෙන් යොදාගත හැකි සංවේදීම මාතෘකාවක් වෙමින් එකිනෙකා තරංගයට හෙළිදරව් කරන්න උත්සාහ කරන ඡන්ද කාල වලට පමණක් මතුවෙන සදාකාලික රහසක්ම වේවිද?
උදය ගම්මන්පිල පුරවැසියෙක් වශයෙන් තමන්ගේ යුතුකම කොන්දේසි විරහිතව සිදු කළ යුතුය. ඔහුගේ දැන් කරළියට පැමිණ තිබෙන මෙම උනන්දුව නොවැම්බර් දාහතර වැනි දායින් පසුව අවසන් වේවිද?
ජනතාවගේ සංවේදී තැන් අවුස්සමින් ආගම ජාතිය දේශය තමාගේ දේශපාලන ගමනට අපූරුවට යොදා ගනිමින් විවිධ නායකයන්ගේ සුරතලා වෙමින් ඔවුන් ළඟ දැවටි දැවටී සිටි ගම්මන්පිල, මෙවර අත තබා ඇත්තේ ඔහු ඉතිහාසයේ සිට මේ දක්වා ගමන් කරන ලද දේශපාලන ගමන් මගේ මීළඟ පිම්මටද?